Feeds:
Posts
Comments

Archive for August, 2012

أنت مين ؟

أنت مين لحتى يجيبوا سيرتك ثوار الحرّية الجدد؟

أنت مين لحتى يندّدوا ويستنكروا ويدينوا دبحك ؟

آه ؟

استشهادك ما أجا على مقاييس الأيام يلي وصلنالا

“Stamps of the Syrian revolution” والدتك مارح يعملولها طابع الثوار ضمن مجموعة

وجهك السمح مارح يعملوا منّو رسم غرافيتي يتفنّنوا فيه على حيطان المدوّنات

لأنو وجهك مو ثورو – جِينيك

أنت مين يا حاتم؟

كنت ناشط حقوقي بزمناتك ؟

اشتغلت معارضجي ؟

اشتغلت مع تاعول حقوق الإنسان أجلّك!؟

أنت عندك تنسيقية ؟

درّسك البابا الإخراج السينمائي بامريكا لتقطع دراستك وتجي على حمص مشان تعمل فلم ضربة الموسم ؟

أنت واحد من خطاطي “كفر نبل ” المحتلة شي !!!؟

حملت علم أبو تلت نجوم ونطّيت عمخيم اللاجئين تبع عمو أردوغان و ذرفت دمعتين أمام الكاميرات متل الأبطال ؟

أنت حملت لافتة وكتبت عليها ” نريد وطناً لكل السوريين” ولبست تيابك الحلوين ونزلت تتمشى بطرقات  الشام ورجعت تغّرد وتفسبك عن بطولاتك الوهمية؟

أنت عانيت غربة المنفى متل الثوار السوريين يلي بيتظاهروا أمام السفارة السوريّة بعمان  ؟

أنت شنطتتك الغربة بمقاهي باريس ؟

أنت نمت برا بيتك بأوتيلات بيروت ؟

أنت كاتب ؟ مثقف ؟ شاعر ؟

أنت أخو المفتي  أو مدير شي جامعة خاصة ليندفعلك مبلغ يليق بمقامك وينفك أسرك؟

أنت مين أنت ..يا أنت

يا رجــوتي ..بعدك زغير

أنت …طالب بجامعة دمشق الحكومية،  قسم إعلام . بتشتغل مساعد كاميرا مان . انخطفت

عذّبوك ، قرّروك بسلميتهن وملائكيتهن، وقعدوا عالبازار بين بتجيب سعرك وبين ما بتجيب سعرك

طلعت ما بتجيب يا مسكين بهالليل يا عيني بهالليل

.أنت شبّيح ، مؤيد ، منحبّكجي

أنت حلال قتلك  ، دبحك  ، شنقك ، سحلك ،صلبك

أنت لازم يسكَروا بدمك

أنت يمكن رافِضيّ نصيري  يعني زنديق ، ويمكن مسيحي  يعني كافر

مين أنت يا حاتم ؟

أنت ولا حدا بدولة سوريستان الديمقراطية الجديدة

زعلان ؟

لا تزعل حاتم  … ما بعرف شو يلي بيعزّي  بهالحكي بس و أنت مخطوف قتلوا موظفين البريد بمنطقة “الباب” زتوهن من على ضهر بناية

هيك ببساطة دعّسوا عليهن وطرش دمهن الأحمر بالأرض

و قبل ساعتين من استشهادك  دبحوا واحد بحلب حزّوا رقبتوا بالسكين سمعت رقبتوا عم تنحز يا حاتم …أي والله عم تنحز على سنة الله ورسوله

تكبــــــــــــــــــــير ر ر ر

.

.

ليش عم خبرك ؟ ما بعرف

ذاكرتي رمانة،  أفرطها عليك حبةً حبة، و أنثرها عليك لؤلؤاً أحمر يليق بوداعٍ لا يطلب مني شيئاً غير النسيان

والله حسيت.. وحياة الرب عرفت …عرفت من لمّا شفت رفقاتك المخطوفين يارا صالح وعبود طيرة

عرفت من لما طلع الفيديو

  من لمّا لمحت جدايل  يارا الشّقر مغلفين بحجاب أسود سميك عرفت النهاية السودا

عرّفت أنكن وقعتوا بأيد كتيبة من كتائب ابن تيمية

قبض قلبي …ولك عرفت عرفت  يا ريت ما عرفت ولا تعرّفت أبداً

.

.

.

و رفيقك البلبل شو مشتقلك كتــير

مخبّيلك بعبّو شي مية سوسنة …يا بني

حاتم أبو يحي خُطف في مدينة التّل أثناء مهمة تصوير ، وقُتل على أيدي عصابات ما يُدعى بالجيش الحر بتاريخ 13 آب 2012

.

.

تكبير : كناية عن عبارة “الله أكبر” تقال لإتمام عملية الذبح أو القتل عموماً على الطريقة الإسلامية الحنيفة،وقد كَثُر استعمالها في ما يعرف ب” الثّورة ” في سوريا . تكبيـــــر

Advertisements

Read Full Post »

%d bloggers like this: